Þrátt fyrir mjög rysjótta tíð frá áramótum þá hefur flaggskipi okkar gengið vel þegar gefið hefur. Frá áramótum hefur Einar fiskað 324 tonn í 30 róðrum sem gerir að meðaltali rúm 10 tonn í róðri. Að sögn skipstjóra þeirra Haraldar Jóns (Nonni Helgu) og Bjarna þá reynist þetta skip alveg einstaklega vel og er alveg ,,hörku” sjóskip. Einar er með beitningarvél um borð og hefur frá áramótum nær eingöngu lagt eina lögn í róðri sem kallað er, en ein lögn er u.þ.b. 42 balar þannig að meðaltal á bala er því u.þ.b. 260kg sem telst bara nokkuð gott almennt séð. Uppistaðan er ennþá þorskur en eitthvað hefur verið að slæðast með af Ýsu og Steinbít eins og gengur.

Nú fer að styttast í Steinbítsvertíðina og er allt á fullu að gera klárt fyrir það tímabil.

Aðrir bátar  hjá Flugölduútgerðinni Hrefna, Straumnes og Eyrarröst sem leggja upp hjá Íslandssögu hefur gengið mjög vel að fiska. Hefur því uppistaðan af hráefni Íslandssögu verið glænýr línufiskur sem fer ferskur til kaupenda okkar í Evrópu og Ameríku með flugi því sem næst daglega.

Og svo hérna ein létt í lokin

Mikið bras og brælutíð

Bíður okkar manna

Allt þó styttir upp um síð

Eins og dæmin sanna.

Langar þig að vinna spennandi lokaverkefni með beina tengingu við atvinnulífið á Vestfjörðum? Markmiðið með “Hafsjó af hugmyndum” er að styrkja lokaverkefni sem skapa aukin verðmæti úr sjávarauðlindinni samhliða eflingu atvinnulífs á Vestfjörðum. Um er að ræða nýsköpunarstyrki til háskólanema við gerð lokaverkefna í mastersnámi. Hafsjór af hugmyndum er styrkt af Sjávarútvegsklasa Vestfjarða en styrkurinn er margþættur.

• Fjárhagslegur
• Miðlun upplýsinga og reynslu frá sjávarútvegsfyrirtækjunum
• Útvega hráefni þegar við á.
• Útvega aðstöðu þegar við á.
• Skapar tengsl milli háskólanema og atvinnulífsins.

Þann 3. Júní 2010 hóf Fiskistofa könnun á samræmi í innkaupum á hráefni og seldum afurðum frá félaginu. 15 janúar s.l. eða rúmum 30 mánuðum eftir að könnun hefst er komin niðurstaða í málið, ekkert athugavert er í innkaupum á hráefni bakreiknað frá afurðum sem félagið seldi.

Stjórnendur Fiskvinnslunnar Íslandssögu hf fagna því að niðurstaða hafi fengist í þetta mál. Það hefur valdið félaginu miklum erfiðleikum í endurskipulagningu á félaginu í kjölfar hrunsins. Samskipti við opinberar stofnanir og fjármálastofnanir hafa ekki verið með eðlilegum hætti eftir að þetta mál kom upp. Nú munu vonandi verða breyting þar á og horfa eigendur félagsins bjartsýnir fram á veginn. Um leið vilja eigendur þakka viðskiptabanka, viðskiptavinum, starfsfólki og öðrum sem stutt hafa við félagið með þolinmæði á þessu tímabili. Það er trú okkar og von að hér sé hægt að byggja upp til framtíðar. Hér að neðan getur að líta bréf Fiskistofu.

Bréf Fiskistofu til Íslandssögu.

Næg atvinna hefur verið hjá fiskvinnslunni Íslandssögu í sumar og hefur ekkert verið stoppað frekar en undanfarin sumur. 

Heimakrakkar frá 15 ára aldri fengu vinnu í sumarfríi sínu frá skóla og stóðu þau sig vel eins og áður. Unnin hafa verið rúm 1300 tonn af ýsu, þorski og steinbít í júní, júlí og það sem af er ágúst og hefur það að mestu leyti farið á markaði í Bretlandi og Bandaríkjunum.

Gæftir hafa verið ágætar hjá bátunum okkar eftir einn erfiðasta vetur í manna minnum en þá féllu margir dagar úr vegna brælu á miðunum. Einnig hefur verið keypt töluvert á mörkuðum og af strandveiðibátum sem réru frá Suðureyri. Þegar þetta er skrifað er nægur fiskur og mikil vinna framundan þessa vikuna.